AnaSehife صفحه اصلی

Türkcə və Farsca Kültürəl - Toplumsal Weblog

Turkic & Persian

Social - Cultural Blog

وبلاگ فرهنگي - اجتماعي

به زبانهاي ترکي و فارسي

About Me

Özumə görə

Arşiv:

آرشيو

Link Yurdu:

لینکستان

توجه:

تبادل لينک به معني تاييد مطالب ديگران،

همفکري و يـا وابستــگي نمي باشد.

Archive(August- December,21.2006 )

سئچگي دن سونرا

þ قاباق كي يازي دا، بو ايلين شورالار سئچگي سي ني، اوچ كسيمه(قيسمته) بؤلوب دئديم كي توپلومسال و ائتنيك پرابلملره گؤره، آذربايجانين بو سئچيم ده كي ان اؤنملي يئرلري، باتي آذربايجان و اؤزلليكده اورمو(اروميه) شهري دير. اورا دا هامي سس وئرمه لي دير و او آدايلار كي بيليرلر يئترلي سس سايي سي گتيرمه يه جكلر، دالا چكيلمه لي ديرلر. 

ايندي ده سئچگي نين سونوجلاري بللي اولوب و دئمك اولار، تكجه اورمو دا، آذربايجانين ضررينه اولان بير اولاي اوز وئريب: « 9 نفر سئچيلميشدن 3 نفري كوردلردن ديرلر». البته بونو دانماق ايسته ميرم كي اورمو دا، كورد يوخدور و اونلارين سئچيلمه سي ياساق اولمالي دير! بلكه دقيق دقت ائتسك بير، اوچ و دؤردونجو يئرلري كوردلر آليبلار. ياني بو ايل ده، توركلرين وئرديگي سسلرين سايي سي سينيب و دؤرديوزمين نفرليك اورمودا، كورد لر اوتوزمين سس ايله شهر شورا سينا يول تاپيبلار!

و البته بو سونوجلار اورمو خالقينين بو ايل كي كولتورل قالخيشلارينين قارشي سيندا ايدي. اولا بيلر كي آذربايجان آيدينلارينين سئچگي دن اؤنجه كي يوخوسونا گؤره، اورمولولاردا ياتيبلار! ايندي ده اينترنت صفحه لرينده چيغير - باغيرين دا فايداسي يوخدور! بيزلر هئچ اولماسا يايدان بو فيكير ده گرك اولايديق و سئچگي اولان گئجه، خالقا فيكير و دوشونجه يئتيرمك ايمكامسيز دير كي هئچ، تورك چاليشقانلارين پيلانسيز ايش گؤرمكلريني آيدينجا گؤسترير.

بيزيم هامي ميزين بير اورتاق دوشمانيميز واردير و او دا، بير دوشونجه دير كي حتي ميليونلار توركون بئينينه گيرميشدير و اونو اؤز ايتي و راديكال گئتمكلريميز ايله آرادان آپارابيلميريك. هامي ائله بيلير نئچه فيكير ايله ايشلمك بيرليكين قارشي سيندا دير؛ آنجاق بعضي زامانلار دا سياست و يا دا مصلحت ايله ايش گؤرمك، چوخ لازيم دير.

منفي موباريزه، و هر نه يي تحريم و ياساق ائتمك باعيث اولور چوخلو امتيازلاري الدن وئرك.

بير اؤرنك وورورام:

ائله بيلين فوتبول ياريشيندا، خطاكار بير تيمين قارشيسينداييق؛ مربي و كاپيتان دا يوخوموزدور! آراجي(داور)، قارشي دا كي تيمين طرفيني ساخلايير و اونلار دا هر جوره خطا ائديب، دال با دال، آفسايد قول دور كي وورورلار؛ بو آرادا فيفا و بوتون دونيادا خطا ائدن تيمين طرفين ساخلايير كي هئچ اؤز تاماشاچيلاريميزين بير سايي سي دا بيزي هويلاييرلار. بئله سيخينتي لارا گؤره بيزيم تيمين اويونچولاري عصبي اولاجاقلار.

بيريسي دئيير گلين بو اويونو ترك ائدك، باشقاسي دئيير گلين داوري ووراق، بيري دئيير دئيير گلين تكجه دفاع ائدك و بيري ده دئيير هامي منه پاس وئرسين، قول ووروم! من گرك بو ياريش دا man of the mach اولام! گوندن آيدين دير بير فورصت ده اله گلسه، مثلا  توپ اونلارين قولئرينين اليندن چيخسا، بوش قولا دا وورابيلمه يه جه ييك! چونكو نئچه سي دالدان باغيريرلار، بو اويونو تحريم ائتميشيك، قول وورمايين.

بيلميرم ياخشي ميثال دئديم يا يوخ آنجاق اورمو بير فوتبول تيمينه بنزه يير كي ليگين سون يئرلرينده دير و آز قالير سقوط ائتسين!

þ چوخلو فورصتلر الدن آلينير؛ و ساده جه چوخلو فورصتلري ده، اؤزوموز الدن وئريريك! چونكو هر نه يي آق يا قارا گؤرمك ايسته ييريك. البته من بورادا بونو يازماق ايسته ميرم كي هئچ آدديم آتيلماميشدير؛ چونكو اولابيلردي دوققوز سئچيلميشين ايكي سي و يا اوچو تورك اولسون و بونون شوكرو واردير.

دئييرلر بير چاق موللا، منبره چيخميش و چوخ يئمكين ضررلر و پيسليكلريندن دانيشيب، خالقا دئييرميش آز يئيين كي كؤكه لمه يه سينيز! آريخليق چاقليق دان ياخشي دير و ياشليلار ايچين، چاقليغين چوخلو تهليكه و خطري واردير. بو آرادا بير كيشي دوروب دئيير: «حاج آغا! ايكي ساعاتدير، دئييرسن آز يئيين آز يئيين! اؤزون دوز آدامسان، سن نئيه بو قدر كؤك و چاقسان؟!»

موللا دا دئيير: «اگر اؤز سؤزلريمه اؤزوم عمل ائتمه سه ايديم، بو منبره چيخابيلمزديم هئچ، حتي آياق اوستونده دورابيلمزايديم!»

ايندي ده، سئچيم قورتاريب و نئچه ميليون تورك ديللي اولان يئر، ياني تهران شهرينده هئچ قازانج اله گلمه ييب دير! هادي ساعي كيمي آداملار دان دا گؤزوم چوخ سو ايچمه يير؛ يا «جامعه ورزشي شهر ري» و يا دا «اصلاح طلبي»(!) جاميعه سينين فيكرينده اولاجاقلار. فارسلار دئميشكن غم ديزي قوجاقلاييب، افسوس يئمه يين دا فايداسي يوخدور. او قدر بيرليك و يالنيز بيرليكدن دانيشيب و عمل ده، ائتمه ميشيك، كي ائله بيلينير، بير ايكي يول و سياستدن سونرا، باشقا ايش باشارميريق!

گلن ايلين سكگيزينجي مجليسين سئچيمينه، فيكر ائتمه لي ييك. آذربايجان آيدينلاري و بيلي يوردلولاري، ايندي دن گرك بير رسمي حيزب آچيليشينين داليسيجا اولوب و ايندي دن، آذربايجانين بوتون بؤلگه لر ايچين، آذربايجان دردلريني دوشونموش آدايلارينين ليستينين فيكرينده اولسونلار. بو دوشونجه لر، تهران دا كي مجليسينين ايچينه داشينمالي دير. صلاحيت و جواز وئريلمه سه ده، اوپتيموم آداملارين گئتمه سينه يارديم ائتمك اولار. آذربايجانين ضررينه اولان آداملارين يول تاپماسي باغلانمالي دير.

واللاه، يارين(صاباح) گئج دير.

¯ ¯ ¯

مين اوچ يوز يئتميش يئدي نين چيلله گئجه سينه گؤره، من بو گئجه لردن خوشوم گلمز؛ چونكو بو گونلر، آذربايجانين بؤيوك عاليمي، پروفسور محمدتقي زهتابي(كــيريشچي)، آللاهين رحمتينه گئتدي. بو گئجه اونوچون بير فاتيحه اوخوياق؛ روحو شاد اولسون.

آنجاق، چيلله(يلدا) گئجه سينه گؤره، بير sms اليمه يئتيشدي، اونو سيز ايچين بورادا يازيرام:

اورگينيز قيش كيمي قارلي، قيشلارينيز سويوق اولسادا

گونشسيز اولماسين

شن گونلرينيز، چيلله گئجه لرينيزجه اوزون

چيلله گئجه نيز ، گؤزل گونلرجه قوتلو اولسون

آيدين ك

1385نجي ايلين ان اوزون گئجه سي

Dec.21 .2006

شورالار سئچگي سي نين اوچ فورماسي

þ گؤردويونوز عكس، كيوي نين شهر شوراسي اويه لرينين سئچيمينه  مربوط دور، كي منه گؤندريبلر. تبلغاتي شوعارلاري اوخويابيلرسينيز؛ يوز رحمت اؤنجه كي سئچگي يه! گئنه نئچه نفر، توركجه سؤزلر و شئعرلر يازميشديرلار! بو سفر توركو-موركو دن اصلا خبر يوخدور:

ما زنده ايم(بيز ديري ييك!)، اينجا زندگي مي كنيم (بورادا ياشاييريق)

و شايسته آنيم تا شهري آباد داشته باشيم(آباد شهره يئيه اولماق، حاققيميز دير)

كهن شهر من شهره آفاق آباد(بو سؤزدن او قدر زهلم گئتدي كي اونو چئويرمه ديم! بيليرم سيز ده ده، حتما بو دويغو واردير كي بو شوعاري يازان، تاريخ، كيمليك، وارليق و ... دان هئچ زاد قانمير!)

تخصيص بودجه مابين دو منطقه به طور عادلانه( ايكي كسيم آراسيندا، بودجه نين عدالت ايله بؤلونمه سي. آشاغي كيوي و يوخاري كيوي نين آراسيندا قديم دن بو داعوا وار! اورادا يئتيشديلر بورا يوخ! اورا دا فيلان اداره ني دوزه تديلر بوردا يوخ! آذربايجانين هر يئرينده بئله ايشلر دوغال دير، ياني طبيعي دير!) 

انتخاب شهردار خوب و دلخواه مردم(ائله بيل خالقا بير جوت باشماق آلاجاقلار)

تلاش در آباداني و ساخت و ساز مابين دو منطقه (بو بير دنه ني دوغرودان دا به يه نديم! بولوجولوك ياپماق دان ياخشي دير. البته گرك دئييردي كي بودجه ني اوچ يئره بؤله جه ييك و بير بؤلومو، تكجه آراليق كيوي يه خرج اولاجاقدير ايكي كيوي بيربيرينه ياپيشسين)

آدايلارينين بيريسينين دانيشماغيني دا ائشيتديم، فارسجا بير مقاله يازميشدير و اونو ميللت ايچين اوخويوردو؛ ائله بيل اصلاحاتچيلار طرفينده ايدي! دقيقه باشي دا «بومي» كلمه سيني دئييردي و دئييردي منطقه نين مودرولري گرك بومي اولسونلار و بونا گؤره شهردار دا گرك بورالي اولسون. من ده اونا ساو يئتيرديم، قديم كي همكيلاس! سنين سؤزلرين دوز، آنجاق سن كي بومي-بومي دئييرسن، اقلا سؤزلريني توركجه قونوش دا! او دا ائله بيل دئميش كي توركجه دانيشماق ساوادي يوخوم، مجبور اولدوم فارسجا يازام و اونو اوخويام.

من ده دئييرم يازيغين حاقي وار دا.

þ خالخال دان چيخاق ائشيگه! سئچگي نين تبليغات فورصتي سونا چاتميشدير. گئچن ايلين تحريم ائدنلري ده ائله بيل توبه ائله ميشلر. خبرلره گؤره، رفورميستلر بيرليك قرارينا يئتيشيب، گوجلو تبليغات ائديرديلر. من جه، بو ايل كي سئچگي ده، اصلاحاتچيلارين باشاري احتمالي چوخدور.

گئچن ايل، آذربايجانين ميللي چاليشقانلار و آيدينلاري، اؤز ايستكلريني، سئچيلجك جومهور باشقانيندان دئديلر. آنجاق بو ايلين سئچگي سينده،  بير خبر يوخدور. آزبيلتوپ كيمي قوروپلار، هاميسي سوسوبلار. گئچن هفته لرده، ائشيتديك كي حكيمي پورون آدي تهرانين اصلاحاتچي ليستينده گلجك؛ آما بير خبر يوخدور. نئچه ميليون، تورك ديللي اولان تهران شهرينده، قومي و ميللي دستكلر اولونماميشدير و البته بونون بير ياخشي ليق و بير پيسليگي واردير:

ياخشي ليق: تورك آدلي قوندارما دستكلري گؤرمه يه جه ييك. بئله جعلي قوروپلار سونرا ميللي حركتين قارشي سيندا يارديمچيليق يئرينه انگل و مانيع اولورلار.

آما بؤيوك پيس ليك ده بو دور كي تهرانين نئچه ميليون توركو، گرك اؤز كولتورل و توپلومسال ايستكلريني شهر شورالاري كيمي يئرلردن ده مطرح ائتسين و البته تهران دا كي ايرانين باشكندي دير و بو چوخ اؤنملي يئردير. بير داها يازيقلار اولسون! اونوتماميشيق او گونلري كي حكيمي پور جنابلاري، تهرانين شهر شوراسينين اويه سي اولاراق، تورك اؤيرنجيلرين توپلانتي لاريني دستكله ييردي.

þ اينديسه تهران دان چيخاق ائشيگه! كند و شهر شورالارين سئچگي سي، باتي(غربي) آذربايجان دا چوخ-چوخ اؤنملي دير؛ اؤزلليكله اورمو، سولدوز، سالماس بؤلگه لرينده.

تورك آدايلارينين چوخلوغو، باعيث اولاجاق تورك آدايلارين اؤي(راي) سايي سي سينسين و بو كورد آزليقلارينين قازانماغينا سبب اولوب و سونوجو دا تورك شهرلريميزين توپلومسال تركيبينه خطري واردير. اومود كي بئله يئرلرينين تورك آدايلاري  آخير لحظه لره قدر، بير بيرلرينين نفعينه قيراغا گئديب و اوندان اؤنملي ده بو دور كي توركلر بو سئچگي ني تحريم ائتمه سينلر. 

آيدين ك

آذر آيي نين 23 نجي گونو - 1385

Dec.14 .2006

هم ميللتچي لر و همده ساتقينلار گونو

61 ايل بوندان اؤنجه:

گوز سونونون سؤيوخ گونلري دير. چيلله نين سويوغو اؤزوندن قاباق گلميشدير. شاختايا گؤره، ائشيگه چيخماق اولمور. دئييلير تندير واختي دير. هامي ائو ايچين ده كورسولره گيريبلر. اوشاقلار، بؤيوك آتالار و آنالارين دئديگي ناغيللارييلا، گئجه لري دانا(صاباحا) چاتديريب، آذربايجانين اوزون قيشي نين سونا چاتماغيني گؤزله ييرلر.

آردي >>>

هم ميللتچي لر و همده ساتقينلار گونو :  ( html page ) و ( pdf file )

آيدين ك

آذر آيي نين 21 نجي گونو - 1385

Dec.12 .2006

مني آتدين آتشه

دونيانين گؤزلليكلري نه قدر چوخ اولسادا دئمك اولار پيسليكلري ده چوخدور؛ مثلا پيسليكلرين بيريسي بودور:

سئوديگميز آدليم آداملارينين دونيايا گلمك خبرلري بيلينمه يير.

اونلار اؤز ياشاديق زاماني، خالقلارينا چوخلو خيدمتلر ائديرلر و نتيجه ده، گئت به گئت مقاملاري ميللت آراسيندا يوكسلير و البته بو يولدا چوخلو چتينليكلر و محبتسيزليكلرده گؤرورلر.

آنجاق دونيادان گئتمكلرينين آجي خبري تئزليكله دئييلير و اوركلري كدرلنديرير. و بيز لر ده اؤلوم خبريني يازيب اوزگونلوكله افسوس يئمكدن سونرا، باشقا بير ايش باشارميريق.

هر حالدا، آذربايجانين ان بؤيوك اينجه صنعت خاديملرينين بيري سي، بابا ميرزايئو، گوز سونونون 14نده(دسامبر آيينين 6سي)، باكي دا، آللاهين رحمتينه گئتدي.

اينترنت ده، بابا ميرزايئوين ياشاييشينا گؤره،  چوخ يازي تاپابيلمه ديم.

بوتون يولداشلاريم كيمي، من ده « مني آتدين آي قيز آي قيز آتشه »، ماهني سيني چوخ سئورديم و اونون متني ني(لايريك) يازديم؛ لوطفا يانليشي اولورسا دئيين دوزلديم.

بويورون دينله يين اونودولماز بابا ميرزايئوين اثريني...

مني ده، بئله قيزلار آتيرلار آتشه

þ يوخاري دا آد آپارديغيم ماهني نين متني ني، اينترنت ده آراييرديم كي بو وبلاگ دا بير تيكه سيني تاپديم(http://aynev.blogfa.com)؛ البته بير باشقا يازي گؤردوم سرعئينلي قيزلارين تحصيل ايچين چتينليكلره گؤره(دشواری‌های تحصيل و اشتغال زنان در يك شهر كوچك/ داستان دختران سرعين ).

البته آرخايينليقلا دئمك اولماز اوندا كي سؤزلر گئرچكديرلر؛ ياني، دوغرودور كي سرعئينين ايلك يوكسك تحصيلاتلي قادينينين 32 ياشي واردير مي؟!

اولابيلر، سرعئينلي لر(كيشي يا قادين، فرق ائتمز!)، آذربايجانين باشقا محروم كندلي لري كيمي بؤيوك يئرلر و شهرلره كؤچوب و اورا دا كي بيلي يوردلار دا تحصيل ائديب و البته كي اؤز آنايوردلارينا قاييتماميشلار! دليلين ده هامي، ياخشي بيلير.

آنجاق بير قادين ايسته سه سرعئين ده قالا و همده بيلي يوردا گئده نه ايش گؤرمه لي دير؟!

يانيت(جاواب) بللي دير يولداشلار!

او قيز مجبور دور اردبيله گئت-گل ائتسين و چون مطالعه يه يئترلي زاماني اولماياجاقدير و « كونكور تست»ـي وورماق ايچين بئله ده حاضيرليغي اولماياجاقدير و گرك جيبدن پول خرج ائله ييب، گئتسين «دانشگاه آزاد»ـا!!

ايندي قالدي بو كي هانسي ريشته يه گئتسين؟! موهنديسليك، كؤك بيليملر(علوم پايه)، طبابت، علوم انساني و يا دا ادبيات؟!

من بئله دوشونورم او قيز ائله بيليب كي فارس ادبياتي باشقا ريشته لردن آسان دير و سون دا، بو ريشته ده درس اوخويوب و فارغ التحصيل اولوب.

ياخشي! بو ده بيزيم اؤلكه ده كي كندلرينين يوكسك تحصيلاتينين ماجراسي! دؤولت گئدير، چئشيدلي ائللرين وئرگيلري ايله، باشقا اؤلكه لرده، فارسجا ديل و ادبيات كورسوسو وورور  و سرعئينلي تورك قيز گرك گئتسين و جيبيندن خرج ائله سين و اؤز ديلينين يازيب-اوخوماسيني باشارماياراق، آزاد دانشگاهين فارسجا ادبيات ليسانسيني آلسين.

آيدين ك

 1385/آذر /19 ، 2006 December.10

Danulduzu Musiqi Qrupu

Ola bilər bir zaman Öyrəncisəl DanUlduzu dərgsində çalışırmışam və buna görə o dərginin adaşı olan, musiqi qrupuna, ki Azər ayının ilk günlərində isfahan Teknoloji biliyurdunda kansert icra etdi, artıq maraq göstərirəm!

Ancaq bu təkcə bir xoş olay(ittifaq) də ola bilər! Aşağı da ki bildirişi oxuyun, olursa Danulduzunun kansertinə də gedin! Hər halda kı görəvimiz, incə sənət xadimləri dəstəkləmək dir: 

Kültürəl - Hünəri Bildiriş

( اطلاعيه فرهنگي-هنري )

Azerbaycanın hünər səmasındakı DanUlduzu musiqi qrupu, bir daha parlaycaqdır...

Ardı >>> ( pdf file , doc file )

Aydın K

November 30, 2006

Səttarxan şəhadətinin 92ci İl dönümünün törəni bu il lap əzəmətli durum da geçirildi və bir planlaşmamış göstəri, Tehran metrosunun İçərisinə qədər davam tapdi...

Ardı >>>

Aydın K

November 17, 2006

صفرخان لا تبريزلي اوشاقلار

ائله بيل دونن ايدي! بو يازيني دؤرد ايل بوندان اؤنجه(صفرخان بو دونيادان كؤچن زامان) فارسجا يازديم، و اينترنت سايتلاريندا اوخوجولار طرفيندن ياخشي ماراقلاندي! بو ايل صفرخان ايل دؤنومونده همن يازيني توركجه يازيرام و بير آز دا اونا باشقا سؤزلر آرتيريرام!

باخيشلارينيزي گؤزله ييرم سايقيلي ديلداشلاريم...

آردي >>>

صفرخان لا تبريزلي اوشاقلار(html file)

صفرخان لا تبريزلي اوشاقلار(pdf file)

آيدين ك

گوز اورتاسي(آبان) 1385

‍Nov.2006

بو اؤدول غرب ايله سس بير اولماغين سونوجو دور مو؟

þ شيرين عيبادي ني كي تانيرسنيز؛ نئچه ايل بوندان اؤنجه، «باريش نوبئل» اؤدولونو آلدي. او اؤزونو دوستاق دا كي اصلاح طلبلره گؤره اؤلدوروردو! مدني حاقلار، دانيشماق اؤزگورلوگو(آزادي بيان) و باشقا حاقلاردان دا مودافعه ائديردي! بيلميرم شيرين عيبادي تورك ايدي يا يوخ، آنجاق آذربايجان دا اوز وئرميش بو ايل كي اتفاقلارا گؤره، گؤردونوز كي، نه قدر ايش گؤردو! اللري آغريماسين.

þ ايلك ده بوتون تورك ادبياتيني سئونلره تبريك و قوتلو اولسون دئييرم. آنجاق بير سؤز كي وار بو دور كي اورتادوغو اؤلكه لر كيمي يئرلرين قازانميش دونياليق اؤدوللري، افتخار و گوونمكدن چوخراق، ساواش و يا دا، باشي آشاغي ليق گتيرير!!

بوتون خبرلرين آراسيندا، وال استريت ژورنال تيتري چوخلو سؤزلر، اؤزو ايله داشييردي:

After Siege at Home, a Nobel

ياني : «ائو ايچينده موحاصيره اولماقدان سونرا، بير نوبئل»!

ياني بو اؤدوللر هر كيمسه يه وئريلمز و تكجه ادبيات يا باريش قونولاريندا گوجلو و تايسيز اولماق، يئترلي دگيل! بيز كي ايرانلي توركوك و تورك ادبياتينين نوبئل آپارماغي بيزلر ايچين چوخ اؤنملي اولابيلر، ايران ايچينده بو خبري گؤردوك:

« ادبيات نوبئل اؤدولو، اورهان پاموكا وئريلدي. اورهان پاموك همن تورك يازار دير كي تورك كيمليكينه توخونماق اتهامينا گؤره، محكمه يه گئتدي. اورهان پاموك بونا گؤره محكمه يه گئتدي كي بير سيويسلي(ايسوئچ) گوندليكه دئميشدي:

توركيه ده ايكي بؤيوك سوي قيريمي اوز وئريب و بير ميليون ائرمني و اوتوز مين كورد اؤلدورولموش؛ حالبوكي توركيه دؤولتي بو قونولارا گؤره سؤز آچماغي  ياساقلاميشدير»(باغلانتي)

آنجاق بو وطنداش خبر آگئنتي، پاموكون بئله سؤزلريني يايماق ايسته مير، چون ضررينه قورتارار:

'Culture Means A Mix Of Things From Other Sources'

كولتور ياني بير باشقا قايناقلاردان ييغيلميش توپلو.

þ دوغروسو بودور كي پاموك بير تايسيز و حرفه اي يازاردير و البته اؤزونو سياسي اولمايان گلوبال دوشونجه لي بير آدام گؤسترمك ايسته يير. او بوتون اينسانلاري، هر ديندن، هر ديلدن و هر رنگدن اولورسا اولسون، سئوير و اونلارين حاقلاريندان دانيشير.

آنجاق بيلميرم ائرمني لرين مظلوملوغوندان دانيشان گلوبال و ديلداش يازار كي تاريخي گئرچكلردن ده باشي چيخير، نئيه روسلار دستكله ين ائرمنيلرين الي ايله قيريلميش آذربايجانليلاردان دانيشمير؛ همن سوي قيريملاري دئييرم كي بيريسي، پاموك دئيه ن، بير ميليون ائرمني اؤلن زامان(!) و بيري سي ده، اون اوچ ايل بوندان اؤنجه، قاراباغ دا اوز وئردي.

þ ايندي، سياستين چيركين دونياسيني گؤرمه ين بير گؤزلوك(عينك) ووراق. هر كيمسه، حتي اورهان پاموك دا، گرك اؤز اؤلكه سينين سينيرلار ايچينده كي حاقلاردان دانيشسين!

منيم ديليمي آنلايان ديلداشلاريم! تورك ديلي ايله يارانميش كيتابلار، 21-نجي يوز ايلده، نوبئل اؤدولونه لاييق گؤرونوب و بو بونو گؤسترير كي تورك ديلينده او گوج وار كي اؤزونو بو حد ده مطرح ائتسين. تأسوفلر اولسون كي ميليونلار ايرانلي توركون، آناديلينده اولان يئتنكلري، ايتيب گئديرلر.

 1385/گوز ايلكي (مهر)/22 ، 2006 October.14

þ مكزيكليلرين بير مثللري(آتالار سؤزو) واردير:

بوتون آداملار جنته(بهشت)  گئتمك ايسته ييرلر، آنجاق هئچ كيمسه ا‬ؤلمك ايسته مير!!

آجيغينيزا گلمه سين؛ هئچ كيمسه يه ده ايليشگي سي اولماسا اؤزباشيما كي دئيينه بيلرم!

سؤزون دوزو بودور :

من، سن و بيز آز چاليشميشيق! اؤز آناديليمزه گؤره، بو ديلين ادبياتينا گؤره! دان چاغيندان، آخشاما قدر دئيينيريك كي بيزيم ديليميزين قاباغيني، سكسن ايل دير كسيبلر و يامان گونه ساليبلار. و چون بيري يوخدور كي بيزيم ديليميزي بيلسين و بيزيم شيكايتلره قولاق وئرسين، بيزيم آيدينلار زور ديلي ايله‫، ظولم ائدنه اورك سؤزو يئتيريرلر. شهريار، سهند و باشقا بئش-آلتي نفر اولماسايديلار، بو اولوس هانسي چاغداش ادبياتدان دانيشاجاقدي؟!

سايتلاردا بير سورغو گؤردوم كي نه ديلده يازمالييق!؟ پيشميش تويوغوندا گولمكي گلير! فيكر ائدين دوشمانلار و يا شوونيستلر(و هر نه سيز اونلارا آد وئريرسينيز) بيلسه لر كي آراميزدا بئله سؤزلر ده دانيشيلير، نه قدر گوله جكلر! بيانيه لر و يازيلار ياييلير و پروتئستلر ائديلير، مئهر آيينين بيرينه گؤره و هله بير سايي بيلميرلر هانسي ديلده يازسينلار.

بو سورغونو سياسي فعاللاريميز اورتايا آتيرلار! سونرا دا بير ايكي نفر گلير دئيير بيزيم اصلي هونريميز، فارسجا سياسي مقاله يازماق دا دير. اوتايداكيلارين اللري آغريماسين! بيزيم جوروموزو چكجكلر! چون اونلار دا وارديلار، نيگرانليق يوخدور، و البته سيدحيدر بيات جنابلاري اؤز تنقيدينده نه قدر گؤزل بو آتالار سؤزونو يازيب كي: « قونشونون اومودونه قالان، گئجه ني شامسيز ياتار! ».

بئش ايل بوندان اؤنجه، بو دانيشيقا تاي، من ايله باشقا بير اؤيرنجيسل درگينين سوروملو مودورون آراسيندا اولدو و اؤيرنجيسل درگيلرين فئستيواليندا كي اورتاق سايي دا، «اؤيرنجيسل دانيشيق» عونواني ايله ياييلدي؛ ايندي كي چاغدا، بو بحثين بير داها يارانماغي، بيزيم حركتين دالييا گئتمكي گؤسترير. 

نه قدر دئييلسه آزدير!

نه قدر يازيلسا آزدير!

نه قدر اولسا آزدير!

و نه قدر ياييلسا آزدير!

...

« باراما » كيمي سايتلاري دئييرم.

البته ياييلميش بوتون يازيلاري اوخودوم، آنجاق  بيلمه ديم «باراما» ياني نه؟!

من كي فيكير ائديرديم باشقا ديللره يازيلميش سياسي سؤزلرين ايچينده باتيب بوغولماقدايام، بو سايتي اوخودوقجا دينجه ليرديم:

طبيل لر ماهني سي

ديل، ديلسيزليك، شعر

بورجوم وار

تاريخين چوخ گيزلين شايعه لريندن

سينماق سسي

...

 1385/گوز ايلكي (مهر)/10 ، 2006 October.02

آذربايجانين دونيادا آدليم اولان اوخوجوسو، تهراندا اوخوياجاق

þ قرار بونايدي كي ياي سونونون ايلكين گونلرينده عاليم قاسيمووون كانسئرتي قورولسون؛ آنجاق اوچ يئديجه(هفته) گئجيكمك ايله اوتوزونوجو گوندن تا مئهر آيينين بيرينه قدر، نياوران ائوينين آچيق بؤلومونده گئچيريله جك.

آذربايجانين آدليم اوخوجوسو عاليم قاسيموو، بو كانسئرت ده، اؤزوندن باشقا، 5 قوزئي-آذربايجانلي موزيسين و چالقيچي دا گتيرمك ايله آذربايجانين موغام و سنتي موسيقي سيني چيخيشا آپاراجاق. فورغانه قاسيمووا (عاليمين قيزي) ، رئوف ايسلاموو، ناطيق شيرينوو، رافائل عسگروو، و علي اصغر محمدوو، عاليم قاسيملا امكداشليق ائدجكلر.

عاليم قاسيموو 1957نجي ميلادي ايلده، قوزئي آذربايجانين شاماخي كندينده بير اورتاق وارلي اولان عاييله ده آنادان اولدو. او اؤز دلي قانليق ياشلاريندا موسيقي يه علاقه تاپيب و بوتون چتينليكلره باخماياراق، اؤز باشاري يولونو تاپدي. عاليمين استثنايي سسي، اونو آذربايجانين اصيل مسيقي سينين اوستادلارينين يانينا چكدي ؛ بئله كي گنجليك چاغيندا حاجي بابا حوسئينوو، نريمان علييئو و  آقاخان عبدالله يئو كيمي بؤيوك موسيقي بيلنلرين اؤيرتيملريندن فايدالانيب و 25 ياشليغيندا،  اؤز نسلينده اولان ان ياخشي اوخوجولارين آراسيندا كي «اوخوماق بؤيوك اؤدولونو» آپارايب، آذربايجانين موغام موسيقيسينين ان بؤيوك اوستادلاريندان اولدو. عاليم قاسيموو، 1999نجو ايلده يونئسكونون موسيقي اؤدولونو اله گتيردي كه ايندي يه قدر «شوستاكوويچ»، «بئرنئشتاين»، «راوي شانكار» و «نوصرت فاتيح عليخان» كيمي بؤيوك موسيقي اوستادلار، اونا لاييق گؤرونموشلر.

عاليم قاسيموو بوندان اؤنجه دؤنه لر كي ايرانا گليب و اينانيلماز شكيلده، خالقين ايستيقبال و آلقيشلاماغييلا قارشيلاشيبدير.

عاليم قاسيموو ايندي يه دك يالنيز ايكي دفه ايرانا گلميشدير. ايلك دفه 1371 نجي ايلين فجر موسيقي فئستيوالي، و ايكينجي دؤنه ده 1381 نجي ايلين قيشي ايدي كي تبريز ده اينانيلماز شكيلده گونئي آذربايجان خالقينين ايستيقبالين گؤردو و اونلارين آلقيشلاماغين گؤرندن سونرا يئري  اؤپمك ايله اؤزتايسيز تواضوعونو گؤستردي. تبريز ده گؤرسنيلن،علاقه لر بونا باعيث اولدو كي قاباقدان پيلانلاشميش 5 گئجه ليك وئرليشلر، 10 گئجه يه چوخاليب و 700 نفرليك سالون ، هر گئج اؤزونده 1000 نفر آذربايجان موسيقي سينه سوسوز قالميش آذربايجانلي گؤروردو.

ايندي يه قدر ، عاليم قاسيموو دان 9 دنه آلبوم ياييلميش كي ايكي آلبوم دا، قيزي فورغانه خانيم دا اونون يانيندا اوخويوب.  رسمي اولاراق «آوازها و ترانه ها» و «چهارگاه بيات شيراز» آلبوملاري، ياييلميش كي خالقين علاقه سي و ايستمك ايله اوزلشيب دير.

تهران دا كي كانسئرتي ، «انجمن موسيقي نياوران »  ، هونر كولتور ائوي و فرهنگ و آهنگ آيليق درگيسينين امكداشليغي ايله قوراجاق. دئمه لي دير كي بو كانسئرتين قورولماق يئري، نياوران كولتورل-ايلايسال ائولر توپلوسوندا يئرلشن  «صاحبقرانيه» قصرينين حيه تي دير كي تزه ليك ده، بو توپلونون موديريت طرفيندن، يئني دن دوزلميشدير و بوندان اونجه، ياي اورتاسينين سون گونلرينده، «ذكر و ذاكرين» فئستيوالينين قورولماق يئري اولموشدور.

دوز دور بيليت پولوسو يوخاري دير، آنجاق عاليم قاسيمووون كانسئرتي ني ياخين دان گؤرمك و ائشيتمك، 10-15 مين دن چوخ چوخ يوكسك ده يرلي دير، ماراقلي اولسانيز آشاغي دا كي يئرلردن بيليت آلا بيلرسينيز:

انجمن موسيقي دانان نياوران، مجموعه فرهنگي تاريخي كاخ نياوران، فرهنگسراي هنر، كافه عكس، نشر چشمه

بير سؤز:

þ گؤره سن اولابيلر بيرگون آنايوردوموزون بوتون بؤيوك و خيردا كندلريميزده ده، طنطنه لي بير كانسئرتلري گؤروب و  اونلاردا اؤز امك بيتيرن موزيسين، موغنني لر، اوخوجولاريميزي گورولتولو آلقيشلاياق ...

اوركدن گلن سسلري، آناديلينده ائشيتمك ايستيرم، يالنيز...!

گونجه لمه (Update):

من جوما آخشامي گئتديم. عاليمين كانسئرتي، طنطنه لي شكيلده قورولدو! دوزدور كي هاوا چوخ سرين ايدي و بتر اوشودوم، آنجاق عاليمين سسي، ايستي قايناغي كيمي، گلنلري(كي ائله بيل تورك اولمايان دا وار ايدي! چونكو بير سايي، اوشاقلارينا يا آروادلارينا، فارسي قيريللاديرديلار) جوشدوروب و دويغولانديريردي.

موبايليم ايله عاليمين سسيني ضبط ائتديم؛ كي اوچ دقيقه ليك بير بؤلومونون amr و يا wma فورماسيني يوكله يه بيلرسينيز: (باغيشلايين كي كيفيتي ياخشي دگيل! آنجاق آرخايين اولون عاليمين تايسيز سسي، كيفيتي ياددان چيخاردير)

amr file , wma file

 1385/ياي سونو (شهريور)/28 ، 2006 September.19