نازلي يار حجله ده مهمان اولاندا

مأذون دئيه ر بو قوناغونگ قرباني           (مأذون قشقايي)

þ آغشين جنابلاري، او زامان(1378 نجي ايلين قيشيندا) اصفهانا گلميشدير و اصفهان تكنولوژي بيلي يوردونون تورك اؤ‬يرنجيلر توپلانتي سيندا حضورو وارايدي و بير مقاله ده اوخودو؛ توپلانتي قورولان گئجه لرينين بيريسينده، بوتون آيدينلار ايله، بيلي يوردون هوتئلينده اوتورموشدوق و توركلرين دوروموندان سؤزلر دئييليردي و بيز اؤيرنجيلرده چوخراق قولاق آسيرديق؛ چونكو هم اونلار قوناق ايديلر و هم ده كي هاميسي آذربايجانين آدليم آيدينلاري ايديلر.

سؤزلرين چوخو آذربايجانليلارين كيمليكي و اونون قوروماغينين گركلي اولماغينا گؤره ايدي؛ يوخاري دا دئديگيميز آغشين جنابي، بير خاطيره سيني دئييردي:

«... خزر دنيزينين ياخينليغيندا اولان هشپر(تاليش) شهرينده بير توي دا دعوت ايديك و قوناقلارين ياريسيندان چوخو، تاليش ايديلر؛ بو تويا نئچه آشيق چاغيريلميش ايدي و بو من ايچين عجيب ايدي كي هشپرين توركلري اؤز كولتورلريني نئجه تانيتديرميشلار كي تاليشلار دا آشيقلاري سئويرلر! آنجاق داغين باتيسيندا اولان آذربايجانين اؤز ايچي خالخال بؤلگه سينده، بير بالا شهر وار كويو(كيوي) آديندا، كي من اورادادا بير تويا دعوت اولونموشدوم. او توي دا كي بوتون آداملارين هاميسي تورك ايديلر، آشيقلاري يوخ ايدي كي هئچ، چالينان بوتون موسيقيلر فارسجا ايدي! ...»

سؤز بورا كي يئتيشدي، بوتون يولداشلار و قوناقلار گولمه يه باشلاديلار، تكجه من دن سونرا؛ نئيه كي من كويولو ايديم! دونوب اونا ايتي اعتراض ائله ييب و دئديم كي بو دوروم آذربايجانين بوتون يئرلرينده آز-چوخ وار و سيز گرك تكجه بير يئري اله سالماياسينيز! سيز اؤزونوز ايندي اصفهان دا سينيز و بير توپلانتي دا چيخيش ائديرسينيز كي آذربايجانين اورگي اولان تبريز ده، بو ايشين تايي چتين ليك ايله اولا بيلر و بيزيم هدفيميز ده ائله بودور كي گؤسترك توركلر هر يئر ده اولسالار گرك اؤز وارليقلاريني و كيمليكلريني قوروسونلار...

البته من او قدر هيجانلا سؤزلريمي دئديم كي يازيق آغشين جنابينين يانيتلاريني ائشيتمديم؛ آرخايين دئييلم، آنجاق ائله بيل كي او دئدي: « من ده ايسته ييرديم كويونو سن دئيه ن سؤزه بير اؤرنك(مثال) دئيه م!»

þ كويو(كيوي، گيوي يا كوثر؛ تانري بيلير گلن ايللر ده آدين نه قويالار) و خالخال دان سؤز گئتدي! بونا گؤره كي دئيه م كويو و خالخالين بوتون تاريخينده اولدوغو كيمي، ايندي ده چوخلو ايگيد و آيدين چاليشير، سيزدن ايسته ييرم كي رجايي بيلي يوردوندا ياييلان «يورد» درگي سي نين ساييلارينين بيريسيني اوخويا سينيز؛ بو درگي نين امكداشلارين ايكيسينين آدي كويولو سؤزو ايله باشلانميش!

þ آشاغي دا كي خبري هم irna ياييب و هم يورد:

كويو باشقا بير شهرستان اولوب؛ اورانين سايي سين چيخاق و دئيه ك خالخال دا 110 مين ياشايان آدامين 20 مين نفري قوجا، 40 مين نفري اوشاق، 30 مين نفري ده ايشله ين 60 - 30 ياشلي آدام اولسون؛ قالار 20 مين نفر گنج و گوجلو ايگيد! فرماندار دئميش حساب ايله،  بونلارين تكجه بئش مين نفرينه ايش واردير؛ باشقا آداملاردا گلجكلرينه نه اومود ايله باخيرلار آلله بيلير.

فيكر ائله ميرم، قيزيل تورپاقلي آذربايجانين باشقا يئرلرينين دورومو، خالخال دان چوخ ياخشي اولسون.

ج.ك(كويولو آيدين)

 1384/قيش سونو (اسفند)/20 ، 2006 March.11

(ديدگاه شما راجع به اين مطالب)Bu Yazılara Görə Baxışlarınız:

باش ساغليغي

n تزه ايله ياخينلاشيريق، آنجاق بير آجي خبر اله چاتيب كي من ده  اونو بورادا ياييب و باش ساغليغي دئييرم:

آذربايجان ميلتي، شرفلي و چاليشقان اوغوللاريندان بيري، "سهند افشاري" جنابلاري­ني الدن وئردي. بو آجي ايتگي­ني و ميللي قارداشيميز سهندين نيسکيللي دونيادان کؤچمه­سين آذربايجان ميللتينه اؤزه­لليکله ميللي حرکتيميزه باش ساغليغي وئريب، اولو تانريدان ناکام، گنج قارداشيميزا رحمت ديله­ييب و اونون حؤرمتلي عاييله­سينه تانريدان دؤزوم ايسته­ييريک.

( بورادا بير حوزونلي كليپ، لينك اولونموش كي دانلود و آنزيپ ائديب، باخابيلرسينيز؛ اديپ آك بايرامين سسي ايله دير)

ايندي يه قدر دئيه بيللم چوخ يارقيلاميشديق، آنجاق بو دفه ايسته ييرم اللر وار دئيه م؛ چونكو ايرانين ان چوخ سايي دا ياييلان گوندليكي(همشهري)، توركجه ديلينده بير اؤزل سايي ياييب و بو ايشين اؤنمي بوردادير كي نئچه گوندن سونرا «دونياليق آناديل گونو» اولاجاقدير. اومود كي بو درگي، اطلاعاتين سهند درگي سي و كئيهانين يول درگيسينه تاي اولماييب و باشاري ايله ايشلرينه دوام وئريب و البته گونده ياييلسين.

چوخ مبارك و قوتلو اولسون، سيزده باش وورون و اوخويون:

ج.ك(آيدين)

 1384/قيش سونو (اسفند)/1 ، 2006 Feb.20

(ديدگاه شما راجع به اين مطالب)Bu Yazılara Görə Baxışlarınız:

دوخسان آلتي ايل بوندان اؤنجه، قيشين ايلك گونلري محرمين ايلك گونلري ايله بير اولموشدور.

روسلار بو اون گونده، كريسمسلريني و يئني ايللريني مبارك ائتمك ايچين، ايراندا و اؤزلليكده آذربايجاندا، قان آرخلاري يولا سالميشديلار!

و ايسته ييرديلر بو جينايتلري، اونلارين قارشيسيندا دوران تبريزلي ايگيدلرين بوينونا آتسينلار! و بونا گؤره، ثيقه الاسلامي(تبريزلي ميرزعلي آغا) توتوب، اوندان ايسته ديلر دئسين کي ساواش و آدام اؤلدورمگي، توركلر باشلاييبلار!! نئيه کي، تبريزليلر اونو بؤيوك بير آدام تانيييرديلار و اونون سؤزلري، خالق آراسيندا اؤنملي ساييليردي؛ بونو روسلار چوخ ياخشي بيليرديلر.

آنجاق او بؤيوك قهرمان، روسلارين سؤزونه قولاق آسمادي و عاشورا گونونده، شرافت ايله شهيد اولماغي سئچدي.

روحو شاد اولسون.

þ  يادينيزدا اولسا گئچن آي دا، چؤلدن شهره گلميش گوناهسيز «آيي»ني تبريز ده اؤلدوردولر! همشهري گوندليكينده بو آجي طنزي ده، مرتضي مجدفر جنابلاري يازيب(اوخويون)؛ ائله كي بيلدينيز بو آيينين اؤلمه سي بوتون مطبوعاتلاردا و حتي راديو-تلويزيون دا دئييلدي و يارقيلاندي! كئشگه توركلرين كولتورل و توپلومسال چتينليكلري ده بئله دئييلسين!

ج.ك(آيدين)

 1384/قيش ايلكي (دي)/22 ، 2006 Jan.12

(ديدگاه شما راجع به اين مطالب)Bu Yazılara Görə Baxışlarınız: